वामीटक्सारका बृद्दहरू हरेकदिन चौपारीमा भजन कीर्तनमा तल्लीन

रामकृष्ण कंडेल,वामीटक्सार✍️

गुल्मीको वामीटक्सार बजारस्थित स्वामीको रूखमुनीको चौपारी यतिबेला बजारकै आत्मिक र सांस्कृतिक केन्द्र बनेको छ।दिउँसोको समयमा यहाँका बृद्द–बृद्दाहरू भेला भई खैंजडी र मजुराको तालमा भजन–कीर्तन र सत्संग गर्दै आउँछन्।

गत छ महिनादेखि निरन्तर रूपमा सञ्चालन भइरहेको यो कार्यक्रम अहिले वामीटक्सार बजारको पहिचान बनेको छ।

चौपारीमा जम्मा भएका बृद्दहरूले भजन गाउँछन्, भगवानको नाम लिन्छन्,एकआपसमा अनुभव बाँड्छन् र आत्मिक शान्तिको अनुभूति गर्छन्।

७१ वर्षका तिलाराम सापकोटा भन्नुहुन्छ, “पहिले दिउँसो समय बिताउन गाह्रो हुन्थ्यो।अहिले यहाँ आउँदा मन हलुका हुन्छ,साथीहरूसँग हाँस्न र भजन गाउन पाइन्छ,जीवन नै रमाइलो भएको छ।”

त्यस्तै, ८८ वर्षका मुरारी सापकोटा मुस्कुराउँदै भन्नुहुन्छ, “खैंजडी र मजुराको तालसँगै जब सबैले भजन गाउछन्, हामीलाई नयाँ उमंग र शान्ति दुवै मिल्छ।यो चौपारी हाम्रो आत्मिक विश्रामस्थल हो।”

बजारका आगन्तुक र युवाको सहभागिता

भजन–कीर्तनको यो वातावरणले बजारमा किनमेल गर्न आउने नागरिकहरूलाई पनि आकर्षित गरेको छ। कोही केहीबेर बस्छन्,कोही भजनमा स्वर मिलाउँछन्,कोही नाचेर रमाउँछन्।युवायुवतीहरूले त चौपारीको रमाइलो क्षण टिकटक र भिडियोमार्फत सामाजिक सञ्जालमा पोष्ट गरेर गाउँको सकारात्मक छवि फैलाइरहेका छन्।

वडाध्यक्ष हरीहर सापकोटा भन्नुहुन्छ, “हामीले बुढाबुढीहरूलाई हाँस्दै,भजन गाउँदै र भजनमा तल्लीन देख्दा निकै आनन्द लाग्छ। उहॅाहरू हाम्रो गाउँका संस्कार र आस्थाका जीवित प्रतीक हुनुहुन्छ”।अध्यक्ष सापकोटाले आफुहरूले उहॅाहरुको माग अनुसार वडा बाट रकम बिनियोजन गरेर वामीटक्सारमा ट्रस निर्माण गरिदिन लागेको युनिक खवर लाई जानकारी दिनुभयो।

समाजसेवीहरूको पहल

यो अभियानको सुरुवात र निरन्तरता दिनमा समाजसेवी तिलाराम सापकोटा र भोजराज सापकोटाको भूमिका महत्वपूर्ण रहेको छ।

समाजसेवी तिलाराम सापकोटा भन्नुहुन्छ, “यो केवल धार्मिक कार्य होइन, समाजमा एकता, संस्कार र सद्भाव फैलाउने अभियान हो। बृद्दहरूलाई सम्मानपूर्वक समाजमा सक्रिय राख्ने हाम्रो उद्देश्य हो।”त्यस्तै ८२ बर्षिय दिर्घ बहादुर रायमाझी भन्नुहुन्छ, “संस्कार हराउँदै गएको समयमा बृद्दहरूको आस्था र अनुभव नै हाम्रो समाजको बल हो। यही सोचका साथ हामी यो अभियान निरन्तर अघि बढाइरहेका छौं।”

संस्कार, आत्मिकता र आधुनिकताको संगम

चौपारीमा अहिले बृद्दहरूको भजन–कीर्तनसँगै महिला समूह र युवाहरूको पनि सक्रियता बढ्दै गएको छ। महिलाहरूले भजनहरू गाएर कार्यक्रममा रंग भर्छन् भने युवाहरूले नाचगान र भिडियोमार्फत त्यसलाई नयाँ स्वरूप दिन्छन्।यसले पुरानो संस्कार र नयाँ पुस्ताबीच सांस्कृतिक पुल निर्माण गरेको छ।

वामीटक्सार बजारमा दिउँसोको समयमा स्वामीको रूखमुनीको चौपारी अब केवल विश्रामको ठाउँ होइन, बरु भक्ति,संस्कार र समुदायको एकताको केन्द्र बनेको छ।खैंजडी र मजुराको तालमा गुञ्जिने भजनले गाउँमा आध्यात्मिक शान्ति, सामाजिक सद्भाव र सांस्कृतिक पुनर्जागरण ल्याइरहेको छ।