परम्परागत लोक नृत्य “सोरठी” लाई नयाँ उचाईमा पुर्याउँदै सर्जक हेमनाथ खराल
रामकृष्ण कंडेल,वामीटक्सार✍️
नेपालको मौलिक सांस्कृतिक धरोहरमध्ये एक, सोरठी नृत्य पुनः एकपटक नयाँ ढंग र सन्देश सहित सार्वजनिक भएको छ। तिहार पर्वको शुभ अवसर पारेर सार्वजनिक गरिएको “सोरठी गीत” ले परम्परा,सन्देश र मनोरञ्जनको समन्वय गर्दै नेपाली लोककला क्षेत्रमा नयाँ ऊर्जा थपेको छ।
गण्डकी,लुम्बिनी र कर्णाली क्षेत्रका गुरुङ र मगर समुदायमा प्रख्यात सोरठी नृत्य नेपालको प्राचीन इतिहास,पौराणिक कथा र सामाजिक एकताको प्रतीकका रूपमा परिचित छ।पन्ध्र रानी र एक राजकुमारीको कथा बोकेको यो नृत्य शैलीले सामाजिक सद्भाव, समानता र राष्ट्रिय एकताको सन्देश दिन्छ।
हालै सार्वजनिक “सोरठी गीत” को रचना र सिर्जना गुल्मेली सर्जक हेमनाथ खरालद्वारा गरिएको हो। उहाँको सृजनामा परम्परागत भैलोलाई आधुनिक सन्देश र प्रस्तुति मार्फत देशदेखि विदेशसम्मका नेपालीहरूलाई जोड्ने उत्कृष्ट प्रयास देखिन्छ। गीतको सङ्गीत,अभिनय र समग्र प्रस्तुतिमा मौलिकता र राष्ट्रिय भावनाको समावेश प्रशंसनीय छ।
सोरठी गीतले देशमै रोजगारी सिर्जना गर्ने,स्थानीय संस्कृति जगेर्ना गर्ने तथा नयाँ पुस्तालाई मौलिक परम्परामा अभिमुख गराउने सन्देश बोकेको छ। गीतका सन्देशपुर्ण शब्दहरू र सशक्त भिजुअलले नेपालभरका दर्शक–श्रोतालाई आकर्षित गरिरहेका छन्।
सर्जक खरालका अनुसार, “मौलिकता हाम्रो इतिहास,पहिचान र चिनारी हो।यसको संरक्षण र जगेर्ना गर्नु हामी सबैको सामूहिक दायित्व हो।”
यस मौलिक सिर्जनामा राष्ट्रिय लोक तथा दोहोरी गीत प्रतिष्ठान नेपाल, गीतकार संघ नेपाल, नेपाल प्रेस सोसाइटी, शान्ति समिति र सगरमाथा साहित्य प्रतिष्ठान लगायतका संघसंस्थाहरूको सहकार्य उल्लेखनीय रहेको छ।
सोरठी नृत्य र गीतमार्फत परम्परा,चेतना,सन्देश र मनोरञ्जनको मिश्रण प्रस्तुत गर्दै हेमनाथ खरालले नेपाली लोककला क्षेत्रमा सृजनात्मक योगदानको नयाँ उदाहरण प्रस्तुत गर्नुभएको छ।यस सिर्जना सांगितिक बजारमा ल्याऊनका लागि गाम्बेसी संस्कृति कला केन्द्र नवलपुर,एकता मगर सङ्घ नवलपुर र नेपाल कुमाल समाज गैंडाकोट नगर समिति को बिशेष सहयोग रहेको सर्जक खरालले युनिक खवर संग को कुराकानीमा बताऊनुभयो।
सर्जक हेमनाथ खराल र सम्पूर्ण टिमलाई युनिक खवर डट कम परिवारको तर्फ देखि हार्दिक बधाई तथा आगामी यात्राका लागि सफलताको शुभकामना।
