देशभक्त जनसमुदायलाई संयुक्त सङ्घर्षको तयारीमा जुट्न मोहन वैद्य( किरण)को अपिल

काठमाडौं । नेपाल कम्युनिस्ट पार्टी (क्रान्तिकारी माओवादी)ले गम्भीर बन्दै गएको देशको राजनीतिक परिस्थिति, राष्ट्रियता, जनतन्त्र तथा जनजीविकाका समस्या, बजेट वक्तव्य लगायतका विषयबारे प्रेसवक्तव्य मार्फत् पार्टीको नीति तथा अभिमत सार्वजनिक गरेको छ ।

१९ जेठमा सार्वजनिक गरेको ४ बुँदे वक्तव्यमा नेकपा (क्रान्तिकारी माओवादी)का महासचिव मोहन वैद्य किरणले ओली सरकारले अध्यादेशमार्फत् ल्याएको बजेट राष्ट्र तथा जनविरोधी भएको ठहर गर्नुभएको छ भने देश निरङ्कुशतावाद, फासीवाद तथा राष्ट्रघातको कहालीलाग्दो अवस्थामा पुग्न थालेका भन्दै छरिएर रहेका क्रान्तिकारी कम्युनिस्टहरु र देशभक्त जनसमुदायलाई संयुक्त सङ्घर्षको तयारीमा जुट्न हार्दिक अनुरोध गर्नुभएको छ ।

यस्तो छ वक्तव्यको पूर्णपाठ
गम्भीर बन्दै गएको देशको राजनीतिक परिस्थिति, राष्ट्रियता, जनतन्त्र तथा जनजीविकाका समस्या, बजेट वक्तव्य लगायतका विषयबारे प्रेसवक्तव्य मार्फत् पार्टीनीति तथा अभिमत यस प्रकार सार्वजनिक गरिएको छ :-
१. सरकारद्वारा पहिलो देखि दोस्रो पटकसम्म प्रतिनिधि सभा विघटन गरेयता अहिलेसम्म आउँदा देशको राजनीतिक परिस्थिति असामान्य बन्दै जान थालेको देखिन्छ । गणतन्त्र, धर्मनिरपेक्षता, सङ्घीयता लगायत जनयुद्ध तथा जनआन्दोलनका आंशिक उपलब्धि गुम्ने मात्र होइन, देशको राष्ट्रिय स्वाधीनता माथि नै गम्भीर खतरा पैदा हुन थालेको छ । यो बेला एकैसाथ राष्ट्रियता तथा जनतन्त्रका समस्या पहिले भन्दा झनै गम्भीर बन्दै गएका छन् र देश निरङ्कुशतावाद, फासीवाद तथा राष्ट्रघातको कहालीलाग्दो अवस्थामा पुग्न थालेको छ । साथै, यो बेला कोरोना महामारी समेतका कारण जनजीविकाका समस्या निकै विकराल बनेका छन् । यसरी जटिल तथा गम्भीर बन्दै गएका समस्याहरूको समाधान उही असफल प्रमाणित भैसकेको संसदीय प्रतिनिधि सभाको मध्यावधि निर्वाचनद्वारा कदापि हुन सक्दैन । यस स्थितिमा वर्तमान सत्ता तथा व्यवस्थाको विकल्पका रूपमा नयाँ जनवादी राज्यसत्ताको स्थापना गरी वैज्ञानिक समाजवाद तर्फ अगाडि बढ्न अनिवार्य रूपमा आवश्यक भएको धारणा हाम्रो पार्टी पुनः स्पष्ट गर्दछ । यो बेला हाम्रो पार्टी विभिन्न ढङ्गले स्वतन्त्र तथा सङ्गठित रूपमा रहेका क्रान्तिकारी कम्युनिस्टहरूलाई एकताबद्ध हुन, क्रान्तिकारी विकल्पबारे गम्भीरतापूर्वक चिन्तन मनन गर्न र संयुक्त रूपमा सङ्घर्षलाई अगाडि बढाउनका लागि विशेष अपिल गर्दछ । त्यसैगरी हाम्रो पार्टी सबै सच्चा देशभक्त, जनतान्त्रिक तथा वामपन्थीहरूसित देशको राष्ट्रिय स्वाधीनताको रक्षा, जनताका जनतान्त्रिक हक अधिकारको प्राप्ति र जनजीविकाका समस्याको समाधानका लागि संयुक्त सङ्घर्षको तयारीमा जुट्न हार्दिक अनुरोध गर्दछ ।
२. सरकारद्वारा अध्यादेश मार्फत् यही जेठ १५ गते रु. १६ खर्ब ४७ अर्ब ५७ करोडको बजेट वक्तव्य जारी गरिएको छ । यस बजेटमा सरकार सञ्चालन सम्बन्धी चालु खर्चतर्फ निकै बढी ४१.२ प्रतिशत र विकास सम्बन्धी पुँजीगत खर्च तर्फ निकै कम २२.७ प्रतिशत विनियोजन गरिएको छ । राजस्वको ठुलो राशि चालु खर्चतर्फ छुट्याइएको छ भने पुँजीगत खर्च विदेशी ऋण तथा अनुदानको कृपामा निर्भर बन्न गएको छ । वित्तीय व्यवस्थापन तर्फको १२.६ प्रतिशत साँवा ब्याज तिर्नमा नै खर्चहुने स्पष्ट छ । यो वर्ष नेपाल निकै ठुलो ऋणभारमा डुब्न गएको छ । यस बजेटमा उद्योग लगायत समग्र अर्थतन्त्रमा वैदेशिक लगानी, विशेष आर्थिक क्षेत्र, कृषिमा कर्पोरेट फार्मिङ् तथा भूमिबैङ्कको व्यवस्था आदिमा विशेष जोड दिइएको छ । यो बजेट उद्योग व्यवसायबाट राष्ट्रिय पुँजीपति र कृषिबाट किसान वर्गलाई विस्थापन गर्ने उद्देश्यमा आधारित छ । यस बजेटमा देशको पर्यावरण तथा राष्ट्रिय अस्मिताका विरुद्ध खानीढुङ्गा, गिट्टी, बालुवा भारत तर्फ निकासी र विद्युतीय प्रसारण लाइनमा एमसीसी परियोजना कार्यान्वयनमा जोड दिएर क्रमशः भारतीय विस्तारवाद तथा अमेरिकी साम्राज्यवादको थप दलाली गरिएको छ । यस बजेटले एकातिर उच्च वर्गका लागि विभिन्न करहरूमा विशेष छुटको व्यवस्था गरेको छ भने अर्कोतिर मजदुर वर्गलाई आवश्यक वेतन, सुविधा, राहत प्रदान गर्ने कामबाट पुरै पछि हटेको छ । साम्राज्यवादी नवउदारवादद्वारा निर्देशित यस बजेटमा जुन समृद्ध नेपाल सुखी नेपाली, समाजवाद जस्ता कुरा उल्लेख गरिएका छन् ती जनतालाई भ्रमित तुल्याउने कसरत बाहेक अरु केही होइनन् । समग्रमा यो बजेट दलाल तथा नोकरशाही पुँजीपति एवम् सामन्त वर्गीय हक हितको संरक्षण, वैेदेशिक प्रतिक्रियावाद परस्तता, परम्परावाद, सस्तो लोकप्रियतावादमा आधारित र जनहित विपरीत, देशको स्वतन्त्र राष्ट्रिय अर्थतन्त्र विरोधी तथा चुनावमुखी रहेको छ । हाम्रो पार्टी यस प्रकारको राष्ट्र तथा जनविरोधी बजेटको सशक्त विरोध गर्दछ ।
३. कोरोना भाइरसजन्य दोस्रो लहरको भीषण आक्रमणबाट जनता निकै छटपटाइरहेका छन् । सरकार एकातिर कोरोना भाइरस परीक्षणको दायरालाई घटाउँदै तथा महामारी न्यून भएको प्रचारबाजी गर्दै त्यसको रोकथाम तथा उपचार लगायत जनताको जीवनरक्षा तथा जनस्वास्थ्य सम्बन्धी जिम्मेवारीबाट भाग्दै कथित चुनावी अभियानमा लागेको छ भने अर्कातिर यो महामारी सहरबाट गाउँतिर व्यापक रूपमा फैलदै गएको छ । रोजगारी गुमाउन र कामबाट वञ्चित हुन पुगेका मजदुर तथा विपन्न जनताको जीवन निर्वाहको समस्या निकै जटिल बन्न गएको छ । यस स्थितिमा हाम्रो पार्टी कोरोना परीक्षणको दायरा बढाउन, निःशुल्क एवम् सर्वसुलभ स्वास्थ्यसेवा उपलब्ध गराउन तथा शीघ्रातिशीघ्र खोपको व्यवस्था मिलाउन र विपन्न, गरिब तथा मजदुर वर्गका जनताका लागि राहत, उद्धार तथा बेरोजगार भत्ताको प्याकेज कार्यक्रम ल्याउनका लागि सरकारसित जोडदार माग गर्दछ ।
४. क. विप्लव नेतृत्वको नेकपाका नेता तथा कार्यकर्ताहरूको कारागारबाट रिहाइका लागि सहमति गरिएकोमा अहिलेसम्म क. हेमन्त प्रकाश वली लगायतका नेता कार्यकर्ताहरूलाई मुक्त गरिएको छैन । हाम्रो पार्टी उहाँहरू सबैको अविलम्व रिहाइका लागि सरकारसित विशेष माग गर्दछ ।

Related Post
विश्वकै कान्छी प्रधानमन्त्री मारिनले गरिन् विवाह

विश्वकै कान्छी प्रधानमन्त्री मारिनले गरिन् विवाह

विश्वकै कान्छी रास्ट्रप्रमुख फिनल्यान्डकी प्रधानमन्त्री सना मारिनले गएको आइतबार आफ्ना प्रेमी मार्कस रायकोनेनसँग विवाह गरेकी छिन्।उनीहरु लामो समयदेखि प्रेमसम्बन्धमा रहँदै आएका थिए। लामो प्रेमलाई गएको आइतबार दुबैले विवाहमा परिणत गरेका हुन्।सिमित आफन्त र साथीभाइका बीच मरिनको विवाह सम्पन्न भएको हो।

एउटा वडाबासिले रुदै बोलाउदा मैले वास्ता नगर्नु पर्थ्यो?: वडा अध्यक्ष काफ्ले

एउटा वडाबासिले रुदै बोलाउदा मैले वास्ता नगर्नु पर्थ्यो?: वडा अध्यक्ष काफ्ले

वडा अध्यक्ष काफ्लेले आफुलाई पिडित पक्षले रुदै घटना स्थलमा बोलाए पछि तुरुन्तै प्रहरीलाई फोन गरेको बताऊनु भएको छ।प्रहरी बोलाऊने बाहेक आफ्नो उक्त बिबाद मिलाऊन भनेर कुनै संलग्नता नरहेको